أصدقائي الأعزاء كل سنة وانتم طيبين... تقبل الله منا ومنكم.... يا ترى أخبار رمضان معاكو ايه السنة دي؟؟ طب ايه أخبار العيد معاكو السنة دي؟ هل حسيتو بفرق ولا لأ؟ طب الفرق ده كان إيجابي ولا سلبي؟؟؟ كل الأسئلة دي نفسي كل واحد فينا يقعد يسألها لنفسه كل فترة بدايةً من دلوقتي ويجاوب فيها على نفسه ويعمل لنفسه معدل لمدى تأثير رمضان على قلبه.... الحقيقة مقال النهاردة هو مش مقال مقال يعني، هو عبارة عن خواطر وتأملات بسيطة كدة خطرت على بالي في رمضان واستفدت منها بفضل الله كتير قوي...
في رأيي الشخصي رمضان ده حاجتين:
1- اختبار حقيقي لمدى إقبال العبد على ربنا، بمعنى إن ربنا أنعم علينا بفرص عظيمة قوي مش بتتكرر إلا في رمضان يعني تسلسل الشياطين ومضاعفة الثواب وجماعية الطاعة و...، وبالطبع لو حد اتدلع وبرضه مأقبلش على ربنا يبقى نتيجة فشله في الاختبار ده زي ما الحديث بيقول: ((تاني جبريل عليه السلام فقال يا محمد من أدرك رمضان فلم يغفر له فأبعده الله فقلت آمين)) رواه المنذري.
2- مدرسة الواحد بيتعلم فيها حاجات من كتر حلاوتها مش بيحس بالوقت فيها مع إن الرؤية العامة للشهر تشير إن أيامه بتخلص بسرعة، إلا أن حلاوة الأشياء اللي الواحد بيتعلمها بتمتّعه بالوقت قوي، ومن نعم ربنا علينا إن تعاليم المدرسة دي بتبقى مختلفة قوي عن أي شيء ممكن يتعلمه في حياته وأثرها أقوى كمان...
ومن بعض اللي ربنا أنعم عليّ بيه واتعلمته من رمضان السنة دي:
1- الواحد لو اتدلع وتمادى في المعاصي أوقات ممكن ربنا يمهله بس ممكن أوقات ربنا يفاجؤه بالعقاب الفوري السريع.
2- لو قعدت أعمل طاعات لمدة طويلة وعملت ذنب متعمداً ومصرّ عليه العقاب ممكن ييجي بسرعة وقوة وبغض النظر عن رصيد الطاعات تماماً.
3- الوقت مهم جداً... لو طول السنة الواحد يعد عمره بالشهر زي ما بيعمل في رمضان، أو بالأيام زي العشر الأواخر، أو بالليلة زي ليلة القدر بالفعل الحياة هتتغير للأصلح على طول بإذن الله.
4- الصبر مهم جداً ولابد منه في حياتنا ختى تستقيم سواءً صبر بالخُلُق أو بالجسد.
5- البيئة الصالحة أساس كل صلاح.
6- مش مهم يكون العمل الصالح كبير وشكله حلو قد ما هو أهم النية تكون صالحة وخالصة لأبعد درجة ممكنة.
7- رمضان شهر وقود إيماني ونفحة إلهية للاستفادة منها طوال العام وليس في وقتها وفقط.
8- قلب المرء لا ينبغي لعاقل أن لا يتعهده بالغذاء كما يتعهد نبتته بالماء، وماء القلب القرآن وقيام الليل في المقام الأول ثم الصحبة الصالحة والعمل الصالح بوجهٍ عام وكل ذلك مصحوب بنية صالحة خالصة.
9- رمضان لؤلؤة عظيمة لا يستشعر قيمتها إلا المجتهد.
10- درجة حضور كل منا في صلاته تعتمد أساساً على حضور قلبه.
11- لعقوق الوالدين منزلة خاصة جداً من العقاب؛ حيث لا يشفع أي رصيد من العمل الصالح لعقاب عقوق الوالدين أبداً.
بقلم/ أحمد مصطفى عبده
مجلة زحمة أفكار الإليكترونية
ليست هناك تعليقات:
إرسال تعليق